സതീഷ് കുമാർ
വിശാഖപട്ടണം
ലോകപ്രശസ്ത ടൂത്ത്പേസ്റ്റ് “കോളിനോസി “ന്റെ പരസ്യചിത്രങ്ങൾ പലരുടേയും ശ്രദ്ധയിൽപ്പെട്ടിട്ടുണ്ടാകുമല്ലോ …?
നക്ഷത്രങ്ങളെപ്പോലെ തിളങ്ങുന്ന പല്ലുകൾ കാട്ടി ചിരിക്കുന്ന
ആ പരസ്യത്തിൽ നിന്നാണ് ഈ ഉൽപ്പന്നം വിപണി പിടിച്ചെടുത്തത്…
എഴുപതുകളിൽ മലയാള ചലച്ചിത്രരംഗത്തെത്തിയ ഒരു ചെറുപ്പക്കാരനെ “കോളിനോസ് പുഞ്ചിരിയുള്ള നടൻ “എന്നാണ് അന്ന് മാദ്ധ്യമങ്ങൾ വിശേഷിപ്പിച്ചത്. ശശികുമാർ സംവിധാനം ചെയ്ത “റസ്റ്റ് ഹൗസ് ” എന്ന ചിത്രത്തിലൂടെ മലയാള സിനിമയിൽ രംഗപ്രവേശം ചെയ്ത ആ നടനാണ് വിൻസെന്റ്.
പ്രേംനസീർ , മധു തുടങ്ങിയ മധ്യവയസ്സ് കഴിഞ്ഞ നായകന്മാരുടെ ഇടയിലേക്കാണ് ചെറുപ്പക്കാരനും സുമുഖനുമായ വിൻസെൻറ് എന്ന നടൻ തന്റെ കോളിനോസ് പുഞ്ചിരിയുമായ് എത്തിച്ചേരുന്നത്.
ഉപനായകവേഷങ്ങളിൽ നിന്നും വളരെ പെട്ടെന്നായിരുന്നു നായകവേഷത്തിലേക്കുള്ള വിൻസെന്റിന്റെ കുതിച്ചുകയറ്റം …
സ്വപ്നങ്ങൾ, മധുവിധു എന്നീ ചിത്രങ്ങളിലെ നായകവേഷം വിൻസെന്റിനെ തിരക്കുള്ള നടനാക്കി മാറ്റി. യുവതികളുടേയും അക്കാലത്തെ ചില നായികമാരുടേയും പ്രേമഭാജനമായിരുന്നു മലയാളത്തിലെ ആദ്യ
ജെയിംസ് ബോണ്ട് എന്നറിയപ്പെട്ടിരുന്ന ഈ നടൻ . മലയാള സിനിമയിലെ ഒരു പ്രമുഖ നായിക തന്റെ നായകനായി വിൻസെന്റിനെയാണ് പല നിർമ്മാതാക്കൾക്കും സംവിധായകർക്കും ശുപാർശ ചെയ്തിരുന്നുത്…
പിൽക്കാലത്ത് ഇന്ത്യൻ സിനിമയിലെ താരറാണിയായി ഉയർന്ന ശ്രീദേവിയുടെ ആദ്യകാല നായകൻ വിൻസെന്റായിരുന്നു .
ഐ വി ശശി സംവിധാനം ചെയ്ത “ആലിംഗനം ” എന്ന ചിത്രം പ്രിയ വായനക്കാർ ഓർക്കുന്നുണ്ടായിരിക്കുമല്ലോ.
പ്രേംനസീർ വില്ലനായി അഭിനയിച്ച “അഴകുള്ള സെലീന ” എന്ന ചിത്രത്തിൽ വിൻസെന്റായിരുന്നു നായകൻ. പ്രേംനസീറിന്റെ സുഹൃത്തായും അനിയനായും പ്രേക്ഷകർ കാണാൻ കൊതിച്ചത് വിൻസെന്റ് എന്ന സുന്ദര നടനെയായിരുന്നു.
https://youtu.be/RQHShboKTSI
1970 മുതൽ 85 വരെ ഏതാണ്ട് ഒന്നര ദശാബ്ദത്തോളം മാത്രം മലയാളസിനിമയിൽ നായകവേഷങ്ങളിൽ തിളങ്ങിനിന്ന വിൻസെന്റിന്റെ മുഖശ്രീയിലൂടെ മിന്നിമറഞ്ഞ ഗാനരംഗങ്ങൾ നിരവധിയാണ്.
“ഇലഞ്ഞിപ്പൂമണമൊഴുകിവരുന്നു …( അയൽക്കാരി, രചന ശ്രീകുമാരൻ തമ്പി, സംഗീതം ദേവരാജൻ, ആലാപനം യേശുദാസ് )
“ഒരു നിമിഷം തരൂ നിന്നിലലിയാൻ …..(സിന്ദൂരം, രചന സത്യൻ അന്തിക്കാട്, സംഗീതം
എ ടി ഉമ്മർ , ആലാപനം യേശുദാസ്)
“പാലരുവി കരയിൽ … (പത്മവ്യൂഹം രചന ശ്രീകുമാരൻ തമ്പി, സംഗീതം അർജ്ജുനൻ, ആലാപനം യേശുദാസ്)
” അമ്പിളി വിടരും പൊന്മാനം പൈങ്കിളി പാടും മലയോരം ….
(കാട്, രചന ശ്രീകുമാരൻ തമ്പി , സംഗീതം വേദ് പാൽവർമ്മ ആലാപനം യേശുദാസ് , എസ് ജാനകി )
” ആദ്യ സമാഗമ
ലജ്ജയിലാതിരാതാരകം കണ്ണടയ്ക്കുമ്പോൾ ….
( ഉത്സവം, രചന പൂവച്ചൽ ഖാദർ സംഗീതം എ ടി ഉമ്മർ , ആലാപനം യേശുദാസ് , എസ് ജാനകി .)
“മരാളികേ മരാളികേ….
( അഴകുള്ള സെലീന, രചന വയലാർ, സംഗീതം യേശുദാസ് , ആലാപനം യേശുദാസ്)
“വാകപ്പൂമരം ചൂടും വാരിളം പൂങ്കുലക്കുള്ളിൽ …. ( അനുഭവം രചന ബിച്ചു തിരുമല, സംഗീതം
എ ടി ഉമ്മർ , ആലാപനം യേശുദാസ് . )
“ദേവി നിൻ ചിരിയിൽ കുളിരോ പാലൊളിയോ …. (രാജപരമ്പര രചന അപ്പൻ തച്ചേത്ത് സംഗീതം
എ ടി ഉമ്മർ , ആലാപനം യേശുദാസ് .)
“സ്വപ്നഗന്ധി പുഷ്പഗന്ധി …. ( അഴകുള്ള സെലീന, രചന വയലാർ സംഗീതം യേശുദാസ് , ആലാപനം
യേശുദാസ്, ബി വസന്ത )
“സ്വർഗ്ഗസാഗരത്തിൽ നിന്നും സ്വപ്നസാഗരത്തിൽ വീണ … (മനുഷ്യപുത്രൻ , രചന വയലാർ, സംഗീതം ദേവരാജൻ , ആലാപനം യേശുദാസ് )
“സൂര്യനും ചന്ദ്രനും പണ്ടൊരു കാലം… ചൂതുകളിക്കാനിരുന്നു ….
(പഞ്ചവടി -ശ്രീകുമാരൻ തമ്പി –
എം കെ അർജുനൻ -ജയചന്ദ്രൻ)
“പ്രിയേ നിനക്കുവേണ്ടി
നിറച്ചു ഞാനെന്റെ ഹൃദയമധുപാത്രം…
(കണ്ടവരുണ്ടോ ശ്രീകുമാരൻ തമ്പി- ആർ കെ ശേഖർ – ജയചന്ദ്രൻ )
“സന്ധ്യതൻ കവിൾ തുടുത്തു …(രാജാങ്കണം അപ്പൻ തച്ചേത്ത് -എം കെ അർജുനൻ –
(ജയചന്ദ്രൻ അമ്പിളി)
” നക്ഷത്രമണ്ഡലനട തുറന്നു
നന്ദനവാടിക മലർ ചൊരിഞ്ഞു… (പഞ്ചവടി -ശ്രീകുമാരൻ തമ്പി- അർജുനൻ -ജയചന്ദ്രൻ )
തുടങ്ങിയ അതിസുന്ദര ഗാനങ്ങളെല്ലാം വിൻസെന്റ് അഭിനയിച്ച ചിത്രങ്ങളിലൂടെയാണ് കേരളീയർ നെഞ്ചിലേറ്റിയത്.
