ഇന്ത്യക്കാർ അയ്യപ്പപ്പണിക്കരുടെ “ഇണ്ടനമ്മാവൻ” കളി തുടരും

പത്തുകൊല്ലമായി കേന്ദ്രത്തിലും ഏഴു കൊല്ലമായി കേരളത്തിലും അധികാരമില്ലാത്തതിന്റെ ഫലമായി ഉണ്ടായ ഒരു രക്തക്കുറവ് കോൺഗ്രസിന്റെ മുഖത്ത് ഉണ്ട് എന്നുള്ളത് ശരിയാണ്. പതിറ്റാണ്ടുകൾ കൊണ്ട് ഉണ്ടാക്കിയ നേതാക്കന്മാരുടെ വ്യക്തിപരമായ അഴിമതി സമ്പാദ്യങ്ങൾ ശോഷിച്ചു ശോഷിച്ചും വരുന്നു. പക്ഷേ അത് ആ പാർട്ടിയോടുള്ള അനുതാപത്തിന് കാരണമാകാൻ പാടില്ല.

വാസ്തവത്തിൽ,കഴിഞ്ഞ അര നൂറ്റാണ്ടായി ഇന്ത്യയിലെ അഴിമതിയുടെ മുത്തശ്ശിയാണ് കോൺഗ്രസ് പാർട്ടി. അധികാരം കിട്ടുമ്പോൾ ഉള്ള ദൈനംദിന അഴിമതികൾ കൂടാതെ,സിഖ് കൂട്ടക്കൊല , ഭോപ്പാൽ ദുരന്തത്തിൽ ഒരു നഗരത്തിലെ ജനങ്ങളെ മുഴുവൻ സായിപ്പിനു വേണ്ടി ഒറ്റിക്കൊടുത്തത് – ഇങ്ങനെയുള്ള നൂറുകണക്കിന് കോൺഗ്രസ് അതിക്രമങ്ങൾ മറക്കാൻ പാടില്ല.

തെരഞ്ഞെടുപ്പിന്റെ ആരവങ്ങൾ ഒഴിയുമ്പോൾ ഇവർ തമ്മിൽ പരസ്പരം സഹകരിക്കുന്നത് കാണാം.പാർട്ടി ഏതുമാകട്ടെ, ഒരു കൊച്ചു രാഷ്ട്രീയക്കാരൻ പോലും ശിക്ഷിക്കപ്പെടില്ല എന്ന് അവർ പരസ്പരം ഉറപ്പു കൊടുത്തിട്ടുണ്ട്. രാഹുൽഗാന്ധിയും നരേന്ദ്ര മോദിയും പരസ്പരം തീയുണ്ടകൾ വർഷിക്കുന്നു എന്ന് തോന്നിപ്പിക്കുന്നതിനിടയിലാണ് ഗാന്ധി- നെഹ്റു കുടുംബത്തിന്റെ മരുമകൻ ഉൾപ്പെട്ട DLF നൂറുകണക്കിന് കോടി രൂപ ബിജെപിയുടെ കൈക്കൂലി സംവിധാനമായ ഇലക്ട്രോറൽ ബോണ്ടിലേക്ക് സംഭാവന ചെയ്ത് തടി കഴിച്ചിലാക്കിയത്..

ഏകോദരസഹോദരങ്ങളായ ഈ തസ്കര പാർട്ടികളുടെ സാരാംശം തിരിച്ചറിയുകയും അവയെ എല്ലാം തിരസ്കരിക്കുകയും സ്വാതന്ത്ര്യസമരകാലത്തേതുപോലെ പൊരുതുന്ന ഒരു പൊതുസമൂഹത്തിന്റെ സൃഷ്ടിക്ക് ശ്രമിക്കുകയും ആണ് ഇന്ത്യക്കാർ ഇപ്പോൾ ചെയ്യേണ്ടത്.ഈ നിയോ-ലിബറൽക്കാലത്ത് സംഭവിക്കാൻ ഒരു സാധ്യതയും ഇല്ലാത്ത, ഈ ഉട്ടോപ്യൻ ആശയം അവതരിപ്പിച്ചപ്പോൾ തന്നെ എനിക്ക് എന്നോട് വെറുപ്പ് തോന്നുന്നു.