സാഗരങ്ങളെ പാടിയുണർത്തിയ സാമസംഗീതം .

സതീഷ് കുമാർ വിശാഖപട്ടണം.

എം ടി വാസുദേവൻ നായർ , ഹരിഹരൻ , ഓ എൻ വി തുടങ്ങിയ പ്രതിഭാധനന്മാരുടെ അപൂർവ്വ സംഗമമായിരുന്നു ” നഖക്ഷതങ്ങൾ ” എന്ന ചേതോഹരമായ ചലച്ചിത്രം .

ചിത്ര എന്ന മലയാളികളുടെ പ്രിയപ്പെട്ട വാനമ്പാടിക്ക് മികച്ച ഗായികയ്ക്കുള്ള ദേശീയ പുരസ്ക്കാരം നേടിക്കൊടുത്ത “മഞ്ഞൾപ്രസാദവും നെറ്റിയിൽ ചാർത്തി മഞ്ഞക്കുറിമുണ്ടു ചുറ്റി … ” എന്ന അപൂർവ്വ സുന്ദരഗാനം ഈ സിനിമയിലായിരുന്നുവല്ലോ..?

ഈ പാട്ടിന്റെ പശ്ചാത്തലസംഗീതം പ്രിയ വായനക്കാർ ശ്രദ്ധിച്ചിട്ടുണ്ടോ എന്നറിയില്ല. ഇടയ്ക്ക ,മദ്ദളം ,ഇലത്താളം, തിമില, ചെണ്ട, നാദസ്വരം, തകിൽ തുടങ്ങിയ കേരളീയ ക്ഷേത്രവാദ്യങ്ങളുടെ നാദബ്രഹ്മങ്ങളായിരുന്നു ഈ ഗാനത്തിന്റെ പല്ലവിയേയും അനുപല്ലവികളേയുമെല്ലാം കൂട്ടിയിണക്കിയത്.

ഒരു ക്ഷേത്ര സംസ്കൃതിയുടെ ദേവഭാവങ്ങൾ ഉണർത്തിയ ഈ ഗാനത്തിന് സംഗീതം നിർവഹിച്ചത് ഒരു മലയാളിയല്ല എന്നറിയുമ്പോൾ നമ്മളെങ്ങിനെയാണ് വിസ്മയിക്കാതിരിക്കുക …? അതെ, ഉത്തരേന്ത്യക്കാരനായ ബോംബെ രവി എന്ന സംഗീത സംവിധായകനാണ് ‘നഖക്ഷതങ്ങ” ളിലെ വശ്യസുന്ദരമായ ഗാനങ്ങളിലൂടെ കേരളീയരെയാകെ അത്ഭുതപരതന്ത്രരാക്കിയത്.

ഈ സംഗീതസംവിധായകന്റെ സംഗീതത്തോടുള്ള സമർപ്പണ ബോധം അറിയണമെങ്കിൽ ഒരു ഗാനം കൂടി എടുത്തുപറയേണ്ടിയിരിക്കുന്നു. എം ടി, ഹരിഹരൻ ടീമിന്റെ തന്നെ “പരിണയം ” എന്ന ചിത്രത്തിലെ “പാർവ്വണേന്ദുമുഖി പാർവ്വതി …..” എന്ന താളാത്മകമായ ഗാനം ഒന്ന് ഓർത്തു നോക്കൂ.

കേരളത്തനിമയാർന്ന, ഐതിഹ്യങ്ങളിൽ തുടിച്ചുനിൽക്കുന്ന “തിരുവാതിര ” എന്ന മലയാളി മങ്കമാരുടെ തനതു കലാരൂപത്തിന്റെ ഭാവാത്മകത ഒട്ടും ചോർന്നുപോകാതെ കേരളീയ സംസ്കൃതിയുടെ താള ബോധത്തോടെ എത്ര സുന്ദരമായാണ് ഈ ഉത്തരേന്ത്യക്കാരൻ നമ്മുടെ പൈതൃകസംഗീതത്തിന്റെ മാന്ത്രിക സ്പർശത്തിലൂടെ ആ ഗാനത്തെ ആസ്വാദ്യകരമാക്കിയത് .

തിരുവാതിരക്കളിയുടെ താളാത്മകമായ ചുവടുകൾക്ക് ദൃശ്യചാരുത പകർന്നു നൽകിയ ഇത്ര സുന്ദരമായ ഒരു ഗാനത്തിന് സാക്ഷാത്ക്കാരം നൽകാൻ മലയാളികളായ സംഗീത സംവിധായകർക്കു പോലും കഴിഞ്ഞിട്ടുണ്ടെന്നു തോന്നുന്നില്ല.

1926 മാർച്ച് 3-ന് ഡെൽഹിയിൽ ജനിച്ച രവിയുടെ യഥാർത്ഥ പേര് രവിശങ്കർശർമ്മ എന്നാണ്. ഉത്തരേന്ത്യൻ ചലച്ചിത്ര സംഗീത രംഗത്ത് മെലഡികളുടെ വിസ്മയം തീർത്തു കൊണ്ടാണ് രവിയുടെ സംഗീത ജീവിതം ആരംഭിക്കുന്നത്. 1960-ൽ പുറത്തുവന്ന ” ചൗദ് വി കാ ചാന്ത് ഹോ ….” എന്ന മുഹമ്മദ് റാഫിയുടെ എക്കാലത്തേയും സൂപ്പർ ഹിറ്റ് ഗാനമാണ് രവി എന്ന സംഗീത സംവിധായകനെ പ്രശസ്തിയിലേക്കുയർത്തിയത്.

1986 -ൽ ഹരിഹരനാണ് ” പഞ്ചാഗ്നി ” എന്ന ചിത്രത്തിലൂടെ രവിയെ “ബോംബെ രവി ” എന്ന പേരിൽ മലയാളത്തിൽ ആദ്യമായി പരിചയപ്പെടുത്തുന്നത്. സാഗരങ്ങളെ പാടിയുണർത്തിയ ആ സാമഗീതങ്ങളുടെ നൂപുരധ്വനികൾ കേട്ട് കേരളം ശരിക്കും കോരിത്തരിച്ചുപോയി. പിന്നീടുവന്ന “നഖക്ഷതങ്ങളി”ലെ “ആരെയും ഭാവഗായകനാക്കും …” “കേവല മർത്ത്യഭാഷ കേൾക്കാത്ത ദേവദൂതികയാണ് നീ … ” “നീരാടുവാൻ നിളയിൽ നീരാടുവാൻ … ” തുടങ്ങിയ ഗാനങ്ങളിലൂടെ ബോംബെ രവി മലയാളത്തിന്റെ ഇഷ്ട സംഗീതസംവിധായകനായി മാറി. ചിത്രയ്ക്ക് വീണ്ടും ഒരു ദേശീയ പുരസ്ക്കാരം നേടിക്കൊടുത്ത വൈശാലിയിലെ

“ഇന്ദുപുഷ്പം ചൂടി നിൽക്കും രാത്രി … ” ” ഇന്ദ്രനീലിമയോലും ഈ മിഴിപ്പൊയ്കകളിൽ…..” എന്നീ ഗാനങ്ങളും കേരളം ഏറ്റുപാടിയതോടെ എല്ലാ സംവിധായകരും തങ്ങളുടെ ചിത്രത്തിൽ ബോംബെ രവിയെ സഹകരിപ്പിക്കാനായി മുന്നോട്ടുവന്നു .

“ഉത്രാളിക്കാവിലെ പച്ചോലപ്പന്തലിൽ … ” ( വിദ്യാരംഭം -രചന കൈതപ്രം – ആലാപനം യേശുദാസ്.)

“കടലിന്നഗാധമാം നീലിമയിൽ … ” ( സുകൃതം – രചന ഒഎൻവി – ആലാപനം യേശുദാസ് , ചിത്ര)

” ഇശൽ തേൻകണം കൊണ്ടു വാ … ” ( ചിത്രം ഗസൽ -രചന യൂസഫലി കേച്ചേരി – ആലാപനം യേശുദാസ് )

“ഭഗവതിക്കാവിൽ വെച്ചോ …” ( ചിത്രം മയൂഖം – രചന മങ്കൊമ്പ് ഗോപാലകൃഷ്ണൻ – ആലാപനം എം ജി ശ്രീകുമാർ)

“ഏഴു സ്വരങ്ങളും പോരാതെ മന്മഥൻ … ” ( ചിത്രം പരിണയം – രചന യൂസഫലി കേച്ചേരി – ആലാപനം യേശുദാസ്)

“സ്വരരാഗ ഗംഗാപ്രവാഹമേ …” ( സർഗ്ഗം രചന യൂസഫലി കേച്ചേരി – ആലാപനം യേശുദാസ് )

“ചന്ദനലേപ സുഗന്ധം …” ( ചിത്രം ഒരു വടക്കൻ വീരഗാഥ – രചന കെ ജയകുമാർ – ആലാപനം യേശുദാസ് )

“പൗർണ്ണമി പൂത്തിങ്കളേ…..” ( ചിത്രം മനസ്സിൽ ഒരു മഞ്ഞുതുള്ളി (രചന എം.ഡി രാജേന്ദ്രൻ – ആലാപനം ജയചന്ദ്രൻ)

“ചന്ദ്രകാന്തം കൊണ്ട് നാലുകെട്ട് …… ” ( ചിത്രം പാഥേയം രചന കൈതപ്രം -ആലാപനം ചിത്ര )

“ഇത്ര മധുരിക്കുമോ പ്രേമം…” ( ചിത്രം ഫൈവ് സ്റ്റാർ ഹോസ്പിറ്റൽ – രചന യൂസഫലി കേച്ചേരി – ആലാപനം യേശുദാസ്)

“പ്രണയിക്കുകയായിരുന്നു നാം ..” ( ചിത്രം മനസ്സിൽ ഒരു മഞ്ഞുതുള്ളി – രചന സുരേഷ് രാമന്തളി ആലാപനം സുജാത, എടപ്പാൾ വിശ്വം)

“ആ രാത്രി മാഞ്ഞുപോയി…..” (പഞ്ചാഗ്നി – രചന ഒ എൻ വി – ആലാപനം ചിത്ര )

https://youtu.be/e2Mk_dUjqj0?t=5

തുടങ്ങിയ എത്രയോ ഗാനങ്ങളിലൂടെ മലയാളികളുടെ സംഗീത അഭിനിവേശങ്ങളെ ഈ മറുനാടൻ സംഗീത സംവിധായകൻ പുളകം കൊള്ളിച്ചിരിക്കുന്നു .

2012 മാർച്ച് 7-ന് തന്റെ സംഗീത ജീവിതത്തിന് വിരാമമിട്ടു കൊണ്ട് യാത്രയായ ബോംബെ രവിയുടെ ചരമവാർഷികദിനമാണിന്ന്. ആരേയും ഭാവഗായകനാക്കുന്ന സ്വരരാഗ ഗംഗാപ്രവാഹത്തിന്റെ രാജശില്പിക്ക് പ്രണാമം. 

————————————————————————–

(സതീഷ് കുമാർ  :  9030758774)