സതീഷ് കുമാർ വിശാഖപട്ടണം.
മലയാളത്തിലെ ജനകീയ സിനിമയുടെ പിതാവ് എന്നറിയപ്പെടുന്ന ജോൺ എബ്രഹാമിന്റെ ആദ്യ ചലച്ചിത്രം ആയിരുന്നു “വിദ്യാർത്ഥികളെ ഇതിലെ ഇതിലെ.
” 1972-ൽപുറത്തിറങ്ങിയ ഈ ചിത്രത്തിൻ്റെ പേരിൽ തന്നെ ഒരു വലിയ സന്ദേശം ഉണ്ടായിരുന്നത് ഇന്ന് ചോര കൊണ്ട് പുതിയ ചരിത്രമെഴുതുന്ന വിദ്യാർത്ഥികളും അവരുടെ മാതാപിതാക്കളുമൊക്കെ ഒന്ന് ഓർത്തിരുന്നെങ്കിൽ എന്ന് ആശിച്ചുപോകുന്നു.
മാദ്ധ്യമങ്ങൾ ആഘോഷമാക്കുന്ന, പതിനഞ്ചാം വയസ്സിൽ കൊലപാതകികളായി തീരുന്ന വിദ്യാർത്ഥികളുടെ കഥ തന്നെയായിരുന്നു ജോൺ എബ്രഹാമിന്റെ ആദ്യ ചിത്രത്തിൻ്റേയും പ്രമേയം. പക്ഷേ അവരുടെ സ്നേഹത്തിൻ്റെ , സമഭാവനയുടെ, സാഹോദര്യത്തിന്റെ , കർത്തവ്യത്തിൻ്റെ നല്ല സന്ദേശമായിരുന്നു മെഹബൂബ് മൂവീസ് നിർമ്മിച്ച ഈ ചിത്രം കാഴ്ചവെച്ചത് .
സിനിമയുടെ കഥയും തിരക്കഥയും എഴുതിയത് പിന്നീട് സംവിധായകനായി മാറിയ എം ആസാദ് . മധു ,ജയഭാരതി ,അടൂർ ഭാസി , എസ് പി പിള്ള തുടങ്ങിയ നടീനടന്മാരോടൊപ്പം പ്രശസ്ത തമിഴ് നടി മനോരമ ഈ ചിത്രത്തിൽ അഭിനയിക്കുകയും അടൂർ ഭാസിയുമായി ചേർന്ന് ഒരു ഗാനം ആലപിക്കുകയും ചെയ്തിട്ടുണ്ട്.
“ചിശ്ചില്ലം ചിലും ചിലും ചിശ്ചില്ലം ചിലും ചിലും ചിങ്കാര പൂങ്കുറവാ നിൻ അമ്മാം കൂടത്തിൽ തേനോ പാലോ ചിങ്കാര പൂങ്കുറത്തി ..” എന്ന ഹാസ്യഗാനം എഴുപതുകളിൽ സ്ഥിരമായി റേഡിയോവിലൂടെ കേൾക്കാമായിരുന്നു. വയലാർ രാമവർമ്മയും എം ബി ശ്രീനിവാസനുമായിരുന്നു ചിത്രത്തിന്റെ സംഗീതശില്പികൾ.
യേശുദാസും ജാനകിയും രണ്ട് വ്യത്യസ്ത ഈണങ്ങളിൽ ആലപിച്ച ഈ ചിത്രത്തിലെ ഒരു ഗാനം തീർച്ചയായും വിദ്യാർത്ഥികൾ കേട്ടിരിക്കണം . ലഹരിയിലും അക്രമത്തിലും അറിയാതെ അകപ്പെട്ടു പോകുന്ന യുവതലമുറയ്ക്ക് ഈ ഈ പാട്ട് ഒരു പ്രചോദനമായി തീരട്ടെ എന്ന് ആശിക്കുന്നു .
ഭാരതത്തിലെ ആദ്യകാല സര്‍വ്വകലാശാലകളായ നളന്ദയേയും തക്ഷശിലയേയും ഓർമ്മപ്പെടുത്തിക്കൊണ്ട് വയലാർ എഴുതിയതായിരുന്നു പ്രശസ്തമായ ഈ ഗാനം .
“നളന്ദ തക്ഷശിലാ നളന്ദ തക്ഷശിലാ
നമ്മുടെ പൂര്‍വികര്‍ പടുത്തുയര്‍ത്തിയ സര്‍വകലാശാല
നളന്ദാ തക്ഷശിലാ നളന്ദ തക്ഷശിലാ നാനാത്വത്തിലോരേകത്വത്തിന്‍ നവദര്‍ശനശാല
സിന്ധുനദീതട സംസ്കാരത്തിന്‍ ശില്‍പ്പകലാശാല …ആ…..നളന്ദാ തക്ഷശിലാനളന്ദ
തക്ഷശിലാ ഋഗ്വേദത്തിലെ ഗായത്രിയുമായ് ഇക്കരെ വന്നവരല്ല, അല്ല ഇക്കരെ വന്നവരല്ല മതങ്ങൾ കൊണ്ടും ഭാഷകൾ കൊണ്ടും മതിലുകൾ തീർത്തവരല്ല,
അല്ല മതിലുകൾ തീർത്തവരല്ല കർഷകരല്ലോ, അവ നിർമ്മിച്ചത് കർഷകരല്ലോ നമ്മുടെ യജ്ഞഭൂമികൾ ഉഴുതുമറിച്ച കൃഷിവലരല്ലോ കൃഷിവലരല്ലോ!
നമ്മുടെ മണ്ണില്‍ നമുക്കുയര്‍ത്തുക നളന്ദകള്‍ – നളന്ദകള്‍ സമഭാവനയുടെ നളന്ദകള്‍ നാളെ യുഗങ്ങള്‍ എഴുത്തിനിരിയ്ക്കും നളന്ദകള്‍ – നളന്ദകള്‍ സ്വതന്ത്രഭാരത നളന്ദകള്‍..”
മഹത്തായ നമ്മുടെ ഭാരതീയ സംസ്കാരത്തെ കുറിച്ച്,ലോകത്തിനുതന്നെ മാതൃകയായ മഹത്തായ രണ്ടു വിദ്യാലയങ്ങളെക്കുറിച്ച് വിദ്യാർത്ഥി സമൂഹത്തിന്റെ സമഭാവനയെ കുറിച്ച് വയലാർ എഴുതിയ അനശ്വര ഗാനം ഇപ്പോൾ ഓർക്കാൻ കാരണം കഴിഞ്ഞദിവസം താമരശ്ശേരിയിൽ 15 വയസു പോലും തികയാത്ത വിദ്യാർത്ഥികൾ നടത്തിയ ഞെട്ടിപ്പിക്കുന്ന ഒരു കൊലപാതകത്തിൻ്റെ വാർത്ത തന്നെയാണ് .
സമഭാവന ഇല്ലാത്ത ഇളം തലമുറക്കാർ തൻ്റെ സഹപാഠിയോട് ചെയ്ത കൊടും ക്രൂരത. എന്താണ് നമ്മുടെ വിദ്യാർത്ഥി സമൂഹത്തിന് സംഭവിക്കുന്നത്. സിനിമ എന്ന കലാരൂപം യുവതലമുറയെ ഏറ്റവും ആകർഷിക്കുന്ന, പ്രചോദിപ്പിക്കുന്ന ഒരു വലിയ മാദ്ധ്യമമാണെന്ന കാര്യത്തിൽ യാതൊരു സംശയവുമില്ല. ഇവരെ ഈ അക്രമവഴിയിലേക്ക് നയിക്കുന്ന സിനിമകളും സിനിമാഗാനങ്ങളും നമ്മുടെ സംസ്കാരത്തിനും സമൂഹത്തിനും യോജിച്ചതാണോ എന്ന് ചിന്തിക്കേണ്ട കാലം അതിക്രമിച്ചു കഴിഞ്ഞിരിക്കുന്നു.
അധോലോക നായകന്മാരേയും ഗുണ്ടകളെയും കേന്ദ്രകഥാപാത്രങ്ങളാക്കി അക്രമത്തിന്റെ ഭയാനക ദൃശ്യങ്ങൾ ചിത്രീകരിക്കുന്ന ഈ സിനിമകൾ നമ്മുടെ പുതിയ തലമുറയ്ക്ക് എന്ത് സന്ദേശമാണ് നൽകുന്നത്.? അടുത്തിടെ യുവതലമുറയെ “ആവേശം ” കൊള്ളിച്ച ഒരു ഗാനത്തെ പറ്റി ഈ അവസരത്തിൽ പറയാതിരിക്കാൻ നിവൃത്തിയില്ല . സമൂഹത്തിന് ഒരു സന്ദേശവും കൊടുക്കാനില്ലാത്ത ഈ പാട്ടെഴുതിയത് വിനായക് ശശികുമാർ എന്ന ഒരു ഗാനരചയിതാവാണ്.
വയലാറും പി ഭാസ്കരനും ശ്രീകുമാരൻ തമ്പിയും യൂസഫലി കേച്ചേരിയും ഒ എൻ വി കുറുപ്പുമെല്ലാം മലയാള ചലച്ചിത്ര ഗാനങ്ങളുടെ അനന്തവിഹായസ്സിൽ പടുത്തുയർത്തിയ കാവ്യ ശില്പങ്ങളെ ഓർത്തു കൊണ്ട് ഈ ഗാനത്തിന്റെ വരികളിലേക്ക് പ്രിയ വായനക്കാർ കണ്ണോടിക്കൂ…
