വാഴക്കുന്നം നമ്പൂതിരി
••••••••••••••••••••••••
ആർ. ഗോപാലകൃഷ്ണൻ
🔸🔸
ഏകദേശേംഅരനൂറ്റാണ്ടു കാലത്തിനു മുമ്പുള്ള കേരളത്തിലെ ജനകീയനായ ജാലവിദ്യക്കാരനായിരുന്നു, വാഴക്കുന്നം നീലകണ്ഠന്‍ നമ്പൂതിരി. കണ്ണഞ്ചിപ്പിയ്ക്കുന്ന വേഷപ്പകർ‌ച്ചയോ രംഗാവതരണത്തിന്റെ പകിട്ടോ ഇല്ലാതെ അദ്ദേഹം ആസ്വാദകവൃന്ദത്തെ വിസ്മയിപ്പിച്ചു.
🔸വാഴക്കുത്തിന്റെ 122-ാം ജന്മവാർഷിക ദിനം, ഇന്ന്;
🔸നാളെ 42-ാം ചരമവാർഷിക ദിനം… 🌹
🌍
1903 ഫെബ്രുവരി 8-ന് പട്ടാമ്പിക്കടുത്ത്, തിരുവേഗപ്പുറയിൽ വാഴക്കുന്നത്ത് ഇല്ലത്ത് രാമൻ അടിതിരിപ്പാടിന്റെയും ആര്യ പത്തനാടിയുടെയും മകനായി ജനനം. ഓത്ത് അഭ്യാസത്തിന് ശേഷം ഇദ്ദേഹം സംസ്കൃതം, ഇംഗ്ലീഷ് എന്നിവ പഠിച്ചു.
ഇരുപതാം നൂറ്റാണ്ടിന്റെ ആദ്യ ദശകങ്ങളില്‍ തിരുവേഗപ്പുറയിലെ വാഴക്കുന്നം മനയിലേക്ക് ഒരു ജാലവിദ്യക്കാരനെത്തി: ‘മുണ്ടായ ഈച്ചരവാര്യര്‍’. കാലിക്കുടത്തില്‍നിന്ന് യഥേഷ്ടം വെള്ളംവീഴ്ത്തുന്ന വിദ്യ കാട്ടിയ ആ മനുഷ്യനാണ് മനയിലെ ഇളംമുറക്കാരനായ നീലകണ്ഠനെ ആദ്യമായി ജാലവിദ്യയിലേക്ക് പ്രചോദിപ്പിച്ചത്.
മുതിര്‍ന്നപ്പോള്‍ ജ്യേഷ്ഠനായ വാസുദേവന്‍ നമ്പൂതിരിയില്‍നിന്ന് സംസ്‌കൃതവും കൊടുങ്ങല്ലൂര്‍ കളരിയില്‍നിന്ന് ആനശാസ്ത്രവും പഠിച്ച വാഴക്കുന്നം നീലകണ്ഠന്‍ നമ്പൂതിരി ഒരു ഐന്ദ്രജാലികനായാണ് പേരെടുത്തത്.
ചെപ്പടിവിദ്യക്കാരനായ ‘പള്ളിത്തേരി നമ്പ്യാത്തൻ നമ്പൂതിരി’യുടെ ശിഷ്യത്വത്തിലാണ് തുടക്കം കുറിച്ചത്. ചെപ്പും പന്തും വിദ്യയിൽ ആചാര്യനായ ഇദ്ദേഹം ക്രമേണ കയ്യൊതുക്കത്തിലും പ്രാവീണ്യം നേടി. ബേക്കർ എന്ന ജാലവിദ്യക്കാരനിൽ നിന്നും ബുള്ളറ്റ് വിദ്യ പരിശീലിച്ചു. അപ്രത്യക്ഷനാവുന്ന വിദ്യ (escape tricks), ശൂന്യതയിൽ നിന്നും വസ്തുക്കളെ സൃഷ്ടിയ്ക്കുക തുടങ്ങിയവയിൽ ഇദ്ദേഹം പ്രഗല്ഭനായിരുന്നു.
🌍
1940-കൾക്ക് ശേഷം മാത്രമാണ് ഇദ്ദേഹം അരങ്ങുകളിൽ ജാലവിദ്യ അവതരിപ്പിച്ചുതുടങ്ങിയത്, അതുവരേയും സന്ദർ‌ശിയ്ക്കുന്ന ഇടങ്ങളിലെ ജനങ്ങളുടെ നിർ‌ബന്ധത്തിനു വഴങ്ങി ചെയ്യുക മാത്രമായിരുന്നു. ഓങ്ങല്ലൂര്‍ ഗണപതിക്ഷേത്രത്തിലായിരുന്നു വാഴകുന്നത്തിന്റെ ആദ്യ മാജിക്.
ഒറ്റമുണ്ടുടുത്ത് നിലത്ത് ചമ്രംപടിഞ്ഞിരുന്ന് കാലിച്ചെപ്പുകള്‍ കമഴ്ത്തിവെച്ച് മാന്ത്രികന്‍ ഇരുന്നു.’അന്ത ചേരാനല്ലൂര്‍ കുഞ്ചുക്കര്‍ത്താവെ സ്മരിച്ച് ഇന്ത ചെപ്പുക്കുള്ളേ വാ!’ ഗുരുനാഥനെ സ്മരിച്ച് മാന്ത്രികന്‍ ചെപ്പു തുറന്നപ്പോള്‍ അതാ, പന്ത് ഒന്നല്ല, നിരവധി! ആ ചെപ്പില്‍നിന്ന് അവിലും മലരും ചിലപ്പോള്‍ കടുകും വന്നു. ചുറ്റും കാണികള്‍ വിസ്മയിച്ചുകൊണ്ടേയിരുന്നു.
