![](https://www.newsboardindia.com/wp-content/uploads/2024/07/nipa-virus-21-a.jpg)
മലപ്പുറം: മാരക പകർച്ച രോഗമായ നിപ ബാധിച്ച് ഒരു കുട്ടി മരിച്ച സാഹചര്യത്തില് മലപ്പുറം ജില്ലയിലെ ചില പഞ്ചായത്തുകൾ അടച്ചുപൂട്ടലിൻ്റെ വക്കിലെത്തി.
പൊതുജനങ്ങള് കൂട്ടം കൂടുന്നത് പരമാവധി ഒഴിവാക്കണമെന്നും നിര്ബന്ധമായും മാസ്ക് ധരിക്കണമെന്നും ജില്ലാ കളക്ടര് വി.ആര് വിനോദ് ഉത്തരവിട്ടു.പൊതുജനാരോഗ്യ നിയമം, ദുരന്ത നിവാരണ നിയമം എന്നിവ പ്രകാരമാണ് ഉത്തരവ്.
പക്ഷികളും വവ്വാലുകളും മറ്റു ജീവികളും കടിച്ച പഴങ്ങള് കഴിക്കരുതെന്നും രോഗലക്ഷണങ്ങള് ഉണ്ടാകുകയോ രോഗിയുടെ റൂട്ട് മാപ്പില് അതേ സമയത്തുണ്ടാകുകയോ ചെയ്തിട്ടുണ്ടെങ്കില് കണ്ട്രോള് റൂമുമായി ബന്ധപ്പെടുകയും ചെയ്യണമെന്ന് കളക്ടര് അഭ്യർഥിച്ചു.
രോഗം ബാധിച്ച് മരണമടഞ്ഞ പതിനാലുകാരൻ്റെ സ്വദേശമായ പാണ്ടിക്കാട്, പഠിക്കുന്ന സ്കൂള് ഉള്പ്പെടുന്ന ആനക്കയം ഗ്രാമപഞ്ചായത്ത് പരിധികളിലും കര്ശനമായ നിയന്ത്രണങ്ങള് ഏര്പ്പെടുത്തി.
ഗ്രാമപഞ്ചായത്ത് പരിധികളില് ആള്ക്കൂട്ടം പൂര്ണ്ണമായും ഒഴിവാക്കണം. മുന്കൂട്ടി നിശ്ചയിച്ച വിവാഹം അടക്കമുള്ള ചടങ്ങുകള് ഏറ്റവും പരിമിതമായ ആളെ മാത്രം വെച്ച് നടത്തണം. മെഡിക്കല് ഷോപ്പുകള് ഒഴികെ കടകളും ഹോട്ടലുകളും രാവിലെ 10 മണി മുതല് വൈകീട്ട് അഞ്ചു മണി വരെ മാത്രമേ പ്രവര്ത്തിക്കാവൂ.
സിനിമാ തിയേറ്ററുകള് പൂര്ണ്ണമായും അടച്ചിടും. സ്കൂളുകള്, കോളേജുകള്, മദ്രസകള്, അങ്കണവാടികള്, ട്യൂഷന് സെന്ററുകള് തുടങ്ങിയവ പ്രവര്ത്തിക്കരുത് എന്നിവയെല്ലാം നിയന്ത്രണങ്ങളില് ഉള്പ്പെടുന്നു.
ജില്ലയിലെ പൊതു നിന്ത്രണങ്ങള്:
പൊതുജനങ്ങള് കൂട്ടം കൂടുന്നത് പരമാവധി ഒഴിവാക്കേണ്ടതാണ്.
പുറത്തിറങ്ങുന്ന സമയത്തും യാത്രകളിലും മറ്റ് കൂടിച്ചേരലുകളിലും നിര്ബന്ധമായും മാസ്ക് ധരിച്ചിരിക്കേണ്ടതാണ്.
സ്കൂള് വിദ്യാര്ത്ഥികള്, അധ്യാപകര് എന്നിവര് സ്കൂള് പ്രവൃത്തി സമയങ്ങളില് നിര്ബന്ധമായും മാസ്ക് ധരിച്ചിരിക്കേണ്ടതാണ്.
കല്യാണം/മരണം/മറ്റ് ആഘോഷങ്ങള് എന്നിവയിലും കൂടിച്ചേരലുകള് പരമാവധി കുറക്കേണ്ടതും സാമൂഹിക അകലം പാലിക്കേണ്ടതുമാണ്.
പനി മുതലായ രോഗ ലക്ഷണങ്ങള് കാണുന്ന സമയത്ത് സ്വയം ചികിത്സിക്കാന് പാടില്ലാത്തതും, ഒരു രജിസ്ട്രേഡ് മെഡിക്കല് പ്രാക്ടീഷണറുടെ ഉപദേശം തേടേണ്ടതുമാണ്.
പക്ഷികള്, വവ്വാലുകള്, മറ്റ് ജീവികള് കടിച്ചതോ, ഫലവൃക്ഷങ്ങളില് നിന്നും താഴെ വീണ് കിടക്കുന്നതോ ആയ പഴങ്ങള് യാതൊരു കാരണവശാലും കഴിക്കാന് പാടുള്ളതല്ല. പഴം, പച്ചക്കറികള് എന്നിവ നന്നായി കഴുകിയതിനു ശേഷം മാത്രമേ ഉപയോഗിക്കാന് പാടുള്ളൂ.
പനി, ഛര്ദ്ദി മറ്റ് ശാരീരിക അസ്വസ്ഥതകള് അനുഭവപ്പെടുന്ന പക്ഷം രജിസ്ട്രേഡ് മെഡിക്കല് പ്രാക്ടീഷണറുടെ ഉപദേശം തേടേണ്ടതും ഇവ പകരുന്ന സാഹചര്യം ഉണ്ടാവുകയാണെങ്കില് 0483-2732010,0483-2732050, എന്നീ നമ്പരുകളില് വിളിച്ച് അറിയിക്കേണ്ടതുമാണ്.