![](https://www.newsboardindia.com/wp-content/uploads/2023/11/pinarayi-vijayan-cpm-1.jpg)
തിരുവനന്തപുരം : മുഖ്യമന്ത്രി പിണറായി വിജയനെ വിമർശിച്ചുകൊണ്ട്
എം ടി വാസുദേവൻ നായര് നടത്തിയ പ്രസംഗം സംബന്ധിച്ച വിവാദത്തിൽ നിന്ന് വിട്ടുനിൽക്കാൻ സി.പി.എം സംസ്ഥാന സെക്രട്ടേറിയറ്റ് തീരുമാനിച്ചു.
വിമര്ശനത്തിൽ പുതുമയില്ലെന്നാണ് പാർടി വിലയിരുത്തൽ. ഇതേ കാര്യം മുൻപും വാസുദേവൻ നായര് എഴുതിയിട്ടുണ്ട്. ഇഎംഎസിനെ അനുസ്മരിച്ച് വർഷങ്ങൾക്ക് മുമ്പ് ഇത്തരത്തിൽ ഒരു ലേഖനം എഴുതിയിരുന്നു. പ്രസംഗത്തിലെ പരാമർശവും ലേഖനവും തമ്മിൽ ഉള്ളടക്കത്തിൽ ചെറിയ വ്യത്യാസം മാത്രമാണുളളതത്രേ.
കോഴിക്കോട് ഡിസി ബുക്സ് സംഘടിപ്പിക്കുന്ന ഏഴാമത് സാഹിത്യോല്സവത്തിലെ ഉദ്ഘാടന വേദിയിലായിരുന്നു വാസുദേവന് നായര് രാഷ്ട്രീയ രംഗത്തെ മൂല്യച്യുതിയെക്കുറിച്ച് പതിവില്ലാത്ത വിധം തുറന്നടിച്ചത്.
ഉദ്ഘാടകനായ മുഖ്യമന്ത്രി പിണറായി വിജയന് വേദിയില് ഇരിക്കെ അധികാരത്തെയും അധികാരികള് സൃഷ്ടിക്കുന്ന ആള്ക്കൂട്ടത്തെയും അതുവഴി രൂപപ്പെടുന്ന നേതൃപൂജകളെയും കുറിച്ച് എം ടി രൂക്ഷമായ വിമര്ശനമാണ് തൊടുത്തുവിട്ടത്.
‘അധികാരമെന്നാല് ആധിപത്യമോ സര്വ്വാധിപത്യമോ ആകാം. അധികാരമെന്നാല് ജനസേവനത്തിന് കിട്ടുന്ന മെച്ചപ്പെട്ട അവസരമെന്ന സിദ്ധാന്തത്തെ എന്നോ കുഴിവെട്ടിമൂടി. റഷ്യന് വിപ്ലവത്തില് പങ്കെടുത്ത ജനാവലി ആള്ക്കൂട്ടമായിരുന്നു’.
ഈ ആള്ക്കൂട്ടത്തെ എളുപ്പം ക്ഷോഭിപ്പിക്കാം. ആരാധകരാക്കാം. ഭരണാധികാരികള് എറിഞ്ഞു കൊടുക്കുന്ന ഔദാര്യത്തുണ്ടുകളല്ല സ്വാതന്ത്ര്യമെന്നും എം ടി പറഞ്ഞു.
തെറ്റ് പറ്റിയാല് അത് സമ്മതിക്കുന്ന ഒരു മഹാരഥനും ഇവിടെയില്ലെന്ന് പറഞ്ഞ എം ടി, ഇക്കാര്യത്തില് ഇഎംഎസിനെയാണ് ഉദാഹരിച്ചത്. നയിക്കാന് ഏതാനും പേരും നയിക്കപ്പെടാന് അനേകരും എന്ന സങ്കല്പ്പത്തെ മാറ്റിയെടുക്കാന് ഇഎംഎസ് എന്നും ശ്രമിച്ചു. നേതൃത്വ പൂജകളിലൊന്നും അദ്ദേഹത്തെ കാണാഞ്ഞതും അതുകൊണ്ടു തന്നെയാണെന്നും വാസുദേവൻ നായര് പറഞ്ഞത് .